kreis

27.11.10 Rede zur Nomination als Nationalratskandidatin


Meine Rede bei der kantonalen Nomination zur Nationalratskandidatin:

"Min Name isch Elisabeth Burgener. Ich bi Fricktalerin.

 Ich bi Muetter vo zwei Töchtere, verhürotet, bruefstätig als Usbildigsleiteri anere Sonderschuel und Werklehreri. Sit 4 Johr bin ich Mitglied vom Grosse Rot.

Ich bewirb mich do um öichi Schtimm, damit nid passiert, was ihr do gsehnt: e leeri Flächi fürs Fricktal, und dass nid passiert, dass s’Fricktal im Wahlkampf kei Schtimm hed.

S’Fricktal umfasst zwei Bezirk, wo im sozialdemokratische Wahlkampf wänd ghört wärde. D’SP Aargau bruecht die Schtimme vo dere dynamische Region mit zuenehmend moderner und urbaner Bevölkerig. Die Region isch zunere schtarke Wirtschafts- und Zuwanderigsregion worde.

Dass s’Fricktal en Schtimm hed und nid schtumm bliebt, bruechts en Vertretig uf dr Lischte, wo d’Fricktaler Schtimme söll mobilisiere.

D’Atommüll-Thematik wird i mim Wahlkampf es politischs Kernaliege si.

Ich möchte, dass die wache Fricktaler Schtimme zumene Aargauer Chor wärde.

Als Initiantin vom Widerstand am Bözberg und als Mitgründerin vom Verein KAIB will ich au mithelfe, dass die kritische Schtimme übers Fricktal use vom Limmettal bis is Wiggetal verno wärde. Ich möchte de Widerstand für es Atommüllager im ganze Kanton für alli Standort verstärke.

Als Vorstandsmitglied vo NWA setz ich mich vehement für en nachhaltigi Energiepolitik ohmi AKWs i. Ich han Chind. Ich möchte nid, dass sie irgendwenn emol s’grosse AKWeh erliede müend.

Als Aargaueri wehr ich mich, dass öise Kanton als Nuklearstandort zum Jurassic-Park vonere antiquierte Energieerzügig wird.

En Imagewandel isch mir au i andere Beriech es zentrals Aliege. Als Mitglied vo dr grossrätliche Sicherheitskommission han ich u.a. für d’SP d’Standesinitiative zum Burkaverbot dörfe vertrete.

Es isch mir drum wichtig, dass dr Aargau au no usemene andere Blickwinkel gseh wird, als nur usem Kuriositäteegge.

Ich setz mich i, dass er wohrgnoh wird als

  • en Kanton, wo sini soziali Verantwortig uf allne Ebene umsetzt.
  • als en Kanton, wo d’Asylpolitik als humanitärs Aliege verschtoht.
  • als en Kanton, wo d’Gliechschtellig und d’Fraueförderig wohrnimmt.
  • und als en Kanton, wo bildigspolitisch meh zbiete hed, als welki Kleeblätter und es           Bildigsmenü à la Schlüer.

Min Name isch Elisabeth Burgener. Ich bin Aargauerin.

Ich danke für öichi Schtimm, damit en dynamischi Region nid schtumm isch."