07.02.11 40 Jahre Frauenstimmrecht

Liebi fierendi Fraue und Manne

Es isch hüt am 7. Februar 2021 phantastisch, do zäme 50 Johr Fraueschtimmrecht z’fiere und uf die letschte 10 historische Johr chönne zruggzluege.

Mir händs tatsächlich gschafft: Es isch keis Phantasiedenke meh. Schwiezwit sind i de Exekutivgremie und i de Parlament d’Fraue und d’Männer zu je mindeschtens 40 % vertrete.

Vo dr visionäre Phantasie zur Realität: mir händ endlich Rahmebedingige für es qualitativ guets und allgemein zuegänglichs Agebot a Familie ergänzende Kinderbetreuigsmöglichkeite, und die dezue nötige schtrukturelle Bedingige sind vorhande.

Und d’Lohnungliechheit: sie isch besitigt, phantastisch! D’Sozialversicherige sind sowit apasst worde, dass d’Fraue nüme benochteiligt sind.

Und au das isch kei Phantasie: Teilzytstelle, au für Männer, sind gschaffe worde. D’Firme händ realisiert, dass d’Veriebarig vo Bruef und Familie es wichtigs Ziel vo jedem Unternehme isch.

Frau und Ma chönned also endlich und gmeinsam wähle, i wellere Form sie Kinderbetröig und Erwerbsarbet wänd gschtalte und wie sie sich die Ufgabe wennd ufteile. Nüme nur en Minderheit vo Fraue isch privilegiert, aktiv am politische Läbe teilzneh.

Schön, dass d’ Wünsch, d’Visione und d’Forderige, wo au vo dr SP-Fraue vor 10 Johr, am 7. Februar 2011, vortreit worde sind, sich nid als Phantasie i dr Luft ufglöst händ.

Es beschtätigt sich also, was d’Judith Schtamm, eini vo dr erschte Fraue im Kantonsrat vo Luzern, emol gseit hed: D’Gschicht vo dr Gliechschtellig isch e Gschicht vo phantastische Idee, wo, wenn mer sie beharrlich verfolgt, am Ändi au verwirklicht wärde.

I dem Sinn, fröie mir öis, das phantastische Jubiläum chönne z’fiere!